小路亂出大路，兼逆線！
小路出大路，呢條亦係停線，冇望清楚就出，仲要轉彎方向唔正確，變成逆線行車，突然見到的士喺前面，急扭軚避佢，變成自炒，完全係疚由自取。
VAN「停線」唔停直出惹禍
停線一定要停，睇清楚才可以出。呢單意外，就係貨VAN停線冇停，仲冇望前面有車，完全係低級錯誤，有理由相信係壞嘅駕駛習慣造成今次事件。
轉彎控制不當 差D撞
左線綠色的士轉彎轉過頭，踩到中間雙白線，差少少就撞到右線車輛。開車速度較高時，轉彎很易 ball out，今次都算輕微 ball out，由控制不當到壓線，就好易發生事故。所以，揸車必要要時刻留意唔好壓線，轉彎亦要小心控制速度。唔好因快得慢。順帶一提，如果過線撞咗，就要負責賠償了。
從後爬頭好易出事
RR9298唔係轉彎位置不當（越線），睇片估計佢係想行去右線，便做出從後爬頭嘅危險動作。唔少司機都會從後爬頭，但好易出事。如果不幸碰撞，肯定係爬頭嘅負責，因為佢做咗切線動作，不過失敗咗！
13車連環相撞點發生？
又係屯門公路。通常連環相撞都喺快線出現，點解會發生？因為快線嘅車一般比較快，而且冇諗住收慢（呢個才係撞車嘅 key point）。其中一部車急煞，後面收唔切就撞埋去，然後連環相撞。
馬路停車好危險
喺馬路中，千祈唔好停車，否則好易被追尾。如視頻中嘅情況，就算佢有緊急事要停車（如真係壞車），都應該盡量靠左之餘，一定要打死火燈，片中汽車打左燈，唔係死火燈，所以非常危險。
職業司機都會睇錯孭仔燈
睇錯孭仔燈，隨時導致交通意外。雖然今次冇發生意外，但係就暴露咗就算職業司機，一樣會錯。右線可右轉（→），但中線貨VAN司機疑似睇錯燈，跟住直去，但其實中線係冇綠燈前行的，唔知係睇錯定想偷雞。好在冇發生意外。
停車停彎心、仲唔打死火燈
喺馬路停車一定要打死火燈（尤其獨立一架或最尾一架），呢位司機突然停車，仲要轉彎位，阻住條路之餘，亦好易發生外。司機突然停車，就係判斷錯誤，冇諗過會有其他司機要用條路。呢種行為可以被告不小心駕駛。
睇錯燈，差D撞到人
前方私家車，睇唔到藍色嘅「只准向前駛」標誌，然後向左轉，咁啱左邊行人交通燈又係綠色公仔。私家車仲直接駛過去，冇停冇讓，極危險。估計司機冇留意到「只准向前駛」標誌。
小路出大路，冇睇清楚嘅教訓
黑色私家車，小路出大路，冇睇清楚大路有巴士直駛中。結果被夾到應一應，導致自己車身損毀，加上要賠償對家，真係自己申請，冇得怨。
轉彎打燈的必要
明明只可右轉，好多司機唔打燈，雖然唔打燈都違規，但係今次VAN仔就係冇打燈，一右轉就撞倒途人。
當然，佢最錯係冇睇清楚路面情況（非常嚴重失誤）。但如果佢右轉有打燈，除咗可提醒後方車輛外，更可以做到提醒路人嘅效果！
打盞燈又唔使錢，點解唔打？
跟車太貼隨時追尾！
都係嗰句，如果駕駛意識唔好，冇發生意外，只係未發生意外，意外係早晚出現。今次電單車好驚險，跌落隔離線，如果有車駛過，後果嚴重！希望今日開始，佢知道揸車！
兩車相撞，切線輸九成...
VAN仔切線冇打燈，直接CUT 過去，人哋行緊正線，收掣不及追尾。雖然本身追尾係會輸，但切線更大責任。因為切線原則係要確保隔離線嘅車，喺唔使收慢嘅情況下，你都過到線才得。而家對方減埋速都撞，即係VAN仔問題。
轉彎過大、過咗人哋條線！
內彎，轉咗去人哋條線，被考官踩停，因為真係危險行為，今次肥得好。好多人都唔識點轉彎，係有學問，唔係亂嚟的！ drivingking 學車王 陪駕 租車 練車 補鐘 學牌